“ De Ramßler – Hoff “ up Plattdütsch

De Geschicht vun dan Ramßler Hoff

De Geschicht vun dan Ramßler Hoff is tämlich ümfangriek un ok bannig interessant.

Ut mien Sichtwies na dat Enn vun´n Krieg kunn ik all vun MTV-Akschonen vertelln, denn wat wör de MTV ahn den Sool vun´n Ramßler Hoff, sien Vereenslokal.

Doar wör Kinnerturnen mit Willi Peters (Pesen Willi). De Sool wör to Pingsten nützt un vör de Bühne kunn man wägen de Höcht vun de Däk sogor een Reck upbohn. Hier wörn de Dräpen mit de Turners vun Hamborg-Eilbek, de jedes Joar een Wettstriet utricht hebbt. Jümmers mit Spälmannszug un väle Besökers. Abends wör denn Turnerball. Näben de Bühne stünn`n Barren, Kassen, Peerd un Trampolin. Doar legen de Matten un in een Schapp wörrn veele lütte Gerätschop. 1964 käm denn de Turnhall an de School. Us eersten Tön op de Dwarsfleit hebbt wi up dissen Saal lehrt un an´n Sünndagmorn wörn dat de Fanfarenbläser. Veele Theoterstücken wörrn hier proft, plattdütsche Opführungen afwickelt un Versammlungen afholln. De Joareshauptversammlungen hebbt noch bet to veer Stünn duert bi öber hunnert Mitglieders. Dor wör sträen un diskuteert ahn Enn. Himmelfohrtsfröschoppen, Kinnerwiehnachtsfiern tohop mit de Generalproof vun dat Theoterstück un noch väl meer. MTV Jubiläen un Football KSB Verbandstagungen wörrn hier regelmäßig affholn.

So wiet de MTV, ober ok de Schüttenvereen mit Schüttenfesten sünd jümmers noch in Erinnerung. De Festkommers mit de Gerichtsverhandlungen un de Kameradschaftsbäll mit Modenschau blievt unvergäten. Un ok Mandags de Inmarsch to de Proklamation mit „Lieben, Locke und Gloria“. De Proklamation vun dan neegen König hett in de föfftiger un sösstiger Joarn dat ganze Dörp beschäftigt.

De Tieden, in de Moers-Lichtspeele op den Sooll de Weekenenns füllt hebbt, wörrn jümmer een Beleevnis un vun de Kinners jümmer mit Freed upnohmen. Twee Dischen, twee Stöhl un de Lienwand harr de richtige Höcht. Näm dat dagsöber Melk, Bodder un Kees bi Magda Grahl geef, wör in´t Näbenzimmer een Lock inne Wand un wenn de Tresen free wör, güng dat los mit de Vörstellung. Wenn de Dreerad-Tempo von Moers üm de Eck bög, leegen wi al op de Luer, dat wi Stöhl upstelln wulln. Doar künn je nich all bi helpen, ober de Belohnung wör een Intrittskoart to de Sünndagsvörstellung. De Western noch in swatt/witt, later denn in Farv, wörrn de Renner. Fuzzy, Zorro, Kalle Blomquist un wat se all heeten hebbt. Twee Schaukassen mit Plokoten wiesen de Programme.

De wichtigst Ruum wör ober rechts vun´n Ingang dat Gemeenkontor. Dor wör dat Riek vun Froo Winkler, de rechte Hand vun´n Börgermeester. Toerst wör Elsbeth Dannowski ok Schrievkraft wäsen. Veele Versammlungen vun dan Gemeenrat wörrn ok hier afholln. Wör wat nich klor, wör dat in de Nöcht an´n Tresen affhannelt.

Emil Lange, de Dörpsgendarm, güng hier jümmers in un ut, doch in de in Gaststuuv wör he nich to finn´n. Toerst wör dat sien Fohrrad, later de Isetta un de Käfer, de sien Anwäsenheed zeigt hebbt.

De Backstä vun Schwarzkopf/Heitmann is in´n Krieg instellt worrn. De Backaben vun de Backstuuv wör in dat Näbenhus. Disse Beritt wör denn umboot un een Veehwacht is dorut worrn. (Näben de Wacht vun Rabens, de E.Baumann öbernam hett  un de Wacht bi Scharfenberg  geef dat nu dree Wachten in´t Dörp). Doar  günn´n somit de Veehhökers un de Buurn as Veehverköpers in un ut. De een or anner Mark wörrn doar al mal utgäben för Grog, Köm un Beer. För de Handwarkers wör dat een gode Gelägenheet,  een Fierobendschoppen to geneiten, de öftmals al na dat Fröhstück anfüng.

Ok uns traditschons Faslamsfest is in Gefohr. De Ramßler hebbt jümmer den groten Sool nutzt, üm de veelen Gäst ünnertokriegen un de Fiern öber dree Dag to bewarkstelligen bet to´n hütigen Dag. Familienfiern – ob Gröne, Sülberne  or Golle Hochtied – as ok grode Geburtsdag würrn hier fiert.

Ernst Schwarzkopf sen. wör Bäckermeester un Dörpskröger, näbenbi wör he Posthalter un he harr noch een lütte Bueree. Bi de groote Wirtschopskrise to Anfang vun de dörtiger Joarn müss he dan Gasthoff un Bueree verköpen. Se tögen in dat Schüttsche Huus gegenöber vun Willi Landahl in de Enge Straat.

To glieke Tied harrn Hans Dörels un sein Froo Gertrud geb. Sonneborn ut Willemsborg de Wirtschaft vun Ernst Schwarzkopf köfft. De Bäckeree is den wieger verköfft worrn an Albert Heitmann.

1958 harr Hans Dörels de Gaststää verköfft, he tög in de Hoster Heid, löter den an de Ohlendörper Straat to sien Dochter.

Hermann un Martha Wieckhorts würrn neege Eegners. Se harrn tovör de Bahnhoffsgaststää in Tangendörp upgeeven. De Wessel vun de Kroegers wörr dormals een groten Ümschwung för den Ramßler Hoff.  Dree junge Deerns hebbt dorvör sorgt, dat de Laden glieks in Schwung keem, ward vun de ölleren Ramßler vertellt. Musikbox un „Runstück warm“, löter den ok „Currywust“, wörrn inföhrt.

De Gaststää wörr ümboot, Frömdenstuuven un de Sool wörrn need makt. Söhn Hermann un Dochter Christa wörrn denn in de Weertschop togang. Christa hett den Muurmann Dieter Mattner ut Bensdörp freet. Beede öbernähmen later den ok de Gaststää. „Tante Martha“ wörr obers de Seel vun de Gaststää. Starkellner in Ramßel wörrn dormols „Höhn Unkel Fritz“ un Otto Schwarzkopf sen.

Peter Pieper hett 1994 de Gaststää öbernamen un bet hüüt mit Ehefroo Tina föhrt.

 

Dat Bild erinnert an dat Joar vun 1914 un is ut een Reiseführer ut dormalige Tied vun Ernst Schwarzkopf.

 

 

Schreben hett datt I. Pape, un int Plattdütsche aber Dieter Heick

Dieser Beitrag wurde unter 04 - Handel und Gewerbe veröffentlicht. Setze ein Lesezeichen auf den Permalink.