Dan „Putzbüdel“ in eeigen Huus !  

För Kinner is de Besöök bi dan Putzbütel nich jümmers een Vergnögen. Besonners nich, wenn de Papa de Putzbüdel is. Mien Broder wär drei Johr jünger, he hät ok blonde Locken hat. Dat wär watt för uns Frisörin ! “Hier ein Löckchen, da een Löckchen aber man bloots nich afschnieden “!

Ik dagegen har man dünne, glatte Hoor wärn ja nich so intresant. De müssen nur rünner und an de Sieden schön kott !! Schön na achtern kämmen, denn noch een Well vörden rin, und noch fastklewt mit Fixativ, un fardig.  Man wär ik dor füünsch !!

Los güng de Arger aber schon mit dan Kinnerstohl:

Wenn uns Papa mi bi de Hoor harr, denn so müss ik up dann Veerbeiner (Bild links). Denn so güng dat los, rünner mit de Dinger !

Deshalv wär uns Gesell ok mien Favorit, bi em‘ wär ik schon groot und künn up da grooten Stohl. De Hoor würn ok nich so kott, und ne Well gew dat schon gornich !                            Nu erst wär ik glücklich !

„ Dat duert aber ok sien Tied, eh man sien Öllern groot hät “ !

—–

De Putzbüdel wär fröher wie een „WhatsApp Gruppe“

Uns Papa käm ut Asendörp und hät öft mool bi Scharfenberg, in Zimmer 1,  Hoor schneen. Dor is ok mien Mama, bi Käthe Scharfenberg, in Stellung wesen. Düsse Biller sind ut de 50 Johrn. Uns Öllern  hebbt ehr Geschäft bi „Sweden Willi“ in de Enge Straat hat. Dat Huus hebbt wie uns deilt mit Familie Karl Zimmermann.

Nu aber to dan Putzbüdel, mit dan „Putzbüdel“ hätt man fröherTiens einen Büdel meent, wo de Babier sien Warktüch in har.

Daumals wär bi dan Putzbüdel tämlich veel los. De Kerdels, meist ut de Landwirt-schaft, kämen meist alle 2-3 Weeken . Bi schlechtet Weer för de Feldarbeit künn man hier schön Klönen. De Ohlendörber hebbt hier de Ramßler dropen und über de Arbeit vertellt. Käm nu de nächte an de Reeg, hör man öft: Goh du man eist, wie snackt grad so scheun !  – Tau scheun, und up düsse Ort hät de Putzbütel mehr weten as de Gastwirt.

Bi de Kerdels kämen de Oolen eenmol de Week taun Rasieren. Nicht to verwesseln mit de rund 25 Rasierkun’n de Sünndags üm 8 vör de Kark und to dan Fröhschoppen müssen. Wenn de Laden vull wär käm dat schon mal vör, dat een Opa een Stunnen töft hät, mit eenmal stünn he up und wull wär na Huus hin, „nu töw doch, du büst glicks anne Reeg !“  >>  Nützt nichts, ick heff vergeten mien Tähn into setten !!

De Frroonslüüd hebbt bi so’n Frisörbesöök  öft noch mehr Tied verbröcht. Den so hät se mit Strick- Häkel- oder Knütt Tüch andropen.

Daumals geev dat noch keen Handy to’n speelen !!   De neisten Illustrierten hät man ok gern mal lest. Bi so’n Duerwell müss man öft schon mol 3 Stunn taubringen. In de Nahkriegstied müssen de Froons noch Brikett för warm Woter mitbringen. Naher bi dat Betohlen, hebbt de Froons von de Hökerladens, ok schon mal dan „Anschriewzettel“ von Inkööp mitbröcht to’n  afreken.  —

Mit de Energieversorgung wär dat ok so’n Saak.  Vör de Festdaag wären Duerwelln nur abends möglich. Der Strom von de  Seev  hät nur af 20 Uhr nich mehr schwankt und utsett.

Ja, so wör dat !!   seggt Ingo Pape

Wer Dag för Dag sien Arbeit deit

      und jümmers op sein Posten steiht,

und deit dat got und deit dat gern,

     de schall sick ok mal amüseern !

Nu is dat sowiet…               … nu is wär de 15. März

De Froons hebbt een Reis na Rom makt, un hebbt di doch dat Corona – Virus mitbröcht.  Tweimool hät de Test anschlahn un den‘n käm noch een PCR Test. Nu hät man dat denn ok schriftlich kreegen vun dat Gesundheitsamt:

Anordnung von Schutzmaßnahmen, Genesungsnachweis :

See hebbt sik vun 17.03.22 bet 26.03.22 häuslich abzusondern (Quarantäne) Den so wär man jümmers noch „positiv“ ober twei Daag löter (28.3.) in dat Testcenter gäw dat een „Negativ Bestätigung“ up dat Handy.  De 10 Daag wärn ja beten watt langwielig und de Kinner hebbt de Soken ut dan Edeka- Markt eenfach vör de Tör stellt. Na twei Daag hät mi dat denn ok erwischt, un ik heff den’n ok Post vun dat Amt kreegen.  Also hät dat heeten keen Besök und keen Kontakt to de Lüüd in de Familie.

At Rentner hät man joo keen Problem dormit, so kann man jo eenfach ut dat Finster kieken !  Ik bün den ok sofort in dan Keller gahn, dor bün ik den‘n ok  „kontaktfrei“ wesen.

 –  Wat sünd schon 10 Daag na twei Corona-Johrn. –

Nu is dat ober schon söß Weeken her, dat Corona-Virus is nu weeg, ober de Symtome noch lang nich. Ut dan Keller bün ik ruut, aber bin jümmers noch maddelig, kaputt un antriebslos, wie man dat hüüt so nennt. De Doktersch meent, man nich gegen angahn un aftöben, kommt als wedder in de Reeg.

Dan April öber hät man veel öber Erleichterungen snackt, un so hebbt de Kinner in de School ok keen Snutenpulli mehr drägen bruukt. De Maske in de Geschäften is ok keen Plicht mehr.   Dat wär den’n ok een Erleichterung !!

Hät man dan ingeschränkten Inkööpsbummel, wie in dan sogenannten „Lockdown“ hat, dor güng dat nur mit de drei  „A’s“,  vun wegen Arzt – Aldi – Aftheeken,  un  jümmers up de Jacht na Kloopapier.   Een poor Bökerstuven hebbt den‘n an Finster jümmer Saaken verköfft. Nix mit stöbern und smökern, ne, allns vörbetellen.

De Renner wärn: Kerkeling sien: Ik bün denn mal weeg !, oder Horst Lichter sien: Ik bün den mal still !  Ik heff na dan Brauereiführer söcht:  Ik bün den mal vull. … ober dat wär vergräpen. Ja, de Geschmäcker sün‘d verschieden !

Ingo Pape in Mai 1922

Watt is mit Corona in Juni un Juli 2022 ?

Is nu all’ns vörbi ?        …. de Ferien gaht los, un de Lüüt wütt in Urlaub !

Nu is de Summer dor un all de Lüüd sünd wer frei von de meisten Inschrinkunhgen. Bi dan Dr. muss nu noch een Mask drägen, sünnst is all’ns klor. All de Fiern de utfalln sünd in Sport un Kultur, Flohmärkte un Festivalls is wär in vulln Ümfang to geneiten. Schützenfest in Ohlendörp is ok all wesen, doch dor sünd ebenso in Jüsborg, sün veele mit een Infektion trüch kommen. Bi dat Danzen oder an Tresen, wer weet dat schon. Öberall luert de Virus up seine Opfer, Vorbie also is dat lang noch nich. Ik bün mit dan Bus na dan Tegernsee reist. Dat weer is goot wesen, de Lüftung in dan Bus is meist beten to kolt wesen. Na de Hinfohrt müss de Busfahrer positiv trüch na Harsefeld. Een Neien is denn komm un an annern Dag güng dat programmgenau wieter. Nu aber hät dat na jeden Fröhstücksgenuss eist mal een Gemeinsamen Test geben, un denn güng dat los in de Bargens. Ein herlichen Urlaub, doch jümmers dat blöde Geföhl und de Angst vör de Krankheit. An letzden Dag müssen ok een Paar noch in Quarantäne för 5 Dag (Urlaubsverlängerung, so to seggen).  Een Poor hät sik positiv test at see in Huus wesen sünd. Alles een tämlich unsichere Saak mit dat Virus. De Inzidenzen sünd ok tämlich steegen, seggt de Winser Zeitung !

Na 10 Dag Quaratäne bün ik sülvens nu all 12 Weeken in „Long Covit“ – Behandlung, ahn Erfolg. Veele Gebreeken hebbt mi tämlich lahm sett. Maddeligkeit, wie dat up platt heet, keen Mumm in de Knoken, und de Kopp is jümmer een beten verquast un achteran. Hoffen kann man jo jümmers, aber bilütten langt dat den ok !  Watt nicht to kott kommen deiht, is de Schlaap, mäuch is man ümmerto; denn so kann man ok nich soveel verkehrt moken, seggt mien Naber.  – – So, un nu mut ik mi eistmal hinlenggen, is wär genauch för dan Moment.

Schützenfest in Ramßel steiht för de Dör, doch sünd ok de Schaustellers dor? Hebbt de noch Lüüt de de Fohrgeschäfte upbaut? De Gastronomie is ok in de Bedrullje vun wegen dat Personal.  –  Man sall öber Politik nich diskutiern un snacken, ober sied Februar is in Europa ja Krieg. Veeles is ut de Bohn lopen und ok de Priese sünd düchtig steegen. Vun de Energie un Lebensmittel, alln‘s is bannig düer worn.

Dütt Mallör nu noch na twei Johr Corona. Dat hät uns jüst noch fehlt !

IPR  in Juli 2022

August 2022

Corona is na dan’n warmen Summer ümmer noch Thema. De School schall nu ok wär losgahn, ober watt ward mit de Kinner? Mööt se wärne Maske drägen oder künnt se mool de Snutt vun dan Schoolmeister tosein kriegen, na drei Johrn.

De öllern Minschen hebbt ok noch ehr Probleme mit de Masken. Tohuus geiht dat ja noch , ober bi dan Doktor, in de Bahn und dann Bus !? Mien Naber schimmp eist gistern wär, he müss wär trüch na Huus vun de Haltestell; denn he har de Mask vergeeten.   Und ik at Brillendräger heff kum noch Platz achter de Ohrn.   Mannich‘een Gummiband sitt so stramm, dat de Ohrn meist na vörden klappt.  Bi dat afnehmen vertüddelt sik dat Band noch mit dan Brillenbügel, und wenn denn noch dat Pech hest, ward dien Hörgerät noch rutkatapultiert,  schimp he,  un wär bannig in de Brast.  Wenn du den‘n an de Kass steihst,  denn krieg dat man erst mol wär in de Reeg !!      —

Vördeil hät so een Mulltasch nur bi dan Tähnarzt,   un de „Drütten“ kannst eenfach mit de Post schicken,  sütt ja keen’een,  wenn de ünnerwegns sünd !

Na miene Corona Infektion in März heff ik nu al 15 Weeken  „Long-Covit“ . Is nich grad scheun sowatt, weil man veel kaputt und möch is öber dan ganzen Daag. Arbeit in Gorden hät man jo nich, weil so bilütten als verdröcht is.

Dor mutt man ober dörch, seggt mien Doktersch !!

Text: Ingo Pape

Keen nu Affstand hölt,

kann sick löter wär umar’m !“

—————————————-

Dat löppt sich allen’s wedder trecht !!

„ Julante, die dicke fette Sau !“

oder „Das fröhliche Dorf“

Mit de Kultur vun de Heimotvereine kummt dat ja nu bilütten in’n Gan’g.

So hebbt se in de „Winser“ een Kinofilm ut de 5oer Johrn ankünnigt. Dat wär een Geschicht vun een dicke Sööch mit Nomen „Julante“. Düsse Film is daumals in Bensdörp dreiht. Besooner för uns Kinner wär dat tämlich upregend, wie hebbt nämlich mitspeelt! Jo, up unsen Domplatz güng dat tämlich hoch her. De Buuern mit jümmer Veehwagen föhn in een groden Kreis up dan Domplatz un wulln an de Versteigerung von de dicke Julante mithelben. „Das fröhliche Dorf“ so hät de Film heten. Düsse Oort Heimatfilme hät daumals veel Upsein bröcht und in dat Filmmuseum kann man jümmers noch oole Filme to sein kriegen. Man sitt in gemütliche Kinosessel und föhlt sick an de Jugendtied erinnert. Düsse Film is in Marxen bi Tönns un ok bi de Ohlendörper Feuerwehr, aber ok in Scharmbeck bi Sander up dan Sool, dreiht worn.

Wi müssen denn at Schoolkinner de Straat na de Wischen rünner lopen neben dan oolen Veihwagen. Mit veel Geschrei sungen wi dat Leid  vun  „Julante die dicke fette Sau !“.  Veelemol müss dat noch wedderholt warn bet man uns mit kohle Getränke und Bonschen entschädigt hätt. De Scholl und dan Lehrer hebbt wi total vergeeten bi dat Spektokel.

De Film leup toeerst in swatt/witt löter is de Film denn ok  nahfarvt worn, un düsse Version hebbt se uns zeigt in dan Winser Marstall.

Man wär dat ne scheune Erinnerung !!

Ingo Pape im August 2022

„ Plattdütsche Geschichten ut een Ort sünd wert, dat man se bewohrt “ !!

Schützenfest is nu in Dörp

Schützenfest in Ramßel

För 70 Johrn noch an de Seev‘ bi Toni und Reinhard, Rühmann ober ok noch Hermine, dor hät dat 12 Johr lang stattfunnen.

Bi Menck’s an de Seev is de Festplatz ünner de Bööm wesen und de 100 m Scheitstand.     Een wunnerboret Idyll, seggt man heut noch.

Hier is ok de längste Tresen wesen vun de Ramß´ler Gasthüüs. Ik seih se noch de langen Reegen mit Beerglöss. Achtern Tresen hät Hein Deumann Beer zappt, Otto Schwattkopp und Höhn Fritz de Oberkellner, ober ok Toni, Reinhard mit Deern Waltraut und Ilse ut Harmsdörp hebbt mitholben.

De Marsch vun dat Dörp wär tämlich mühsam, besunners noch mit dat Koppsteenplaaster. Dortau käm noch de swore Joppen bi de Hitt und mit Haut up’n Kopp. Komandeur August Blecken hät nich so öcht Marsch-erleichterung geben. Sünnabend, Sünndag und Mondag müssen de Schützen mit Kapell und Speelmannszug rünner na de Seev, egal watt dat för een Weer wesen is. Vörden weg mit Polizeischutz vun Emil Lange, dan Dörpsschandarm, in Deenstuniform mit Pritschesbüx un Leddersteebel. Up dan Saal wör denn gemeinsam mit „Lieben, Locke, Gloria“ inmarschiert, sowie mit beide Vereinsfahn‘.  Na een Ansprach käm denn de erlösenden Satz vun August: „Zur Theke weggetreten !“

Wie is so’n Festball afflopen in de oolen Tie’n an de Seev‘ ?

Los güng dat pünklich Klock acht. De Komandeur hät een Tusch bestellt; denn wör Ruhe in Saal. De Ehrendanz för dan König und de Atjudanten. All‘ Lüüt nu up dan Saal hebbt een Kreis bild , dat Königsgepann inne Mitt. Nu wär eistmol de neie Kledasch vun dat Gespann beklatscht, dortau kämen denn noch öft een poor Ehrengäst vun de Nachborvereine, eist jetzt dröffen de Poore jümmer „Pflichtdänz“ erledigen.

Öberhaupt hät de Musik dan Ton angeben. Up een Podest 7m lang un 4 m deip mit een Gelänner hebbt se ehren Platz hat, 6 Stufen öber de Saalfläche. Direkt dorför wären de Ehrendische, de künn man grad so rupkieken.

Vun boben hebbt se allns in Blick hat, und wenn tau veel Fronns mit,nanner danzt hebbt wör dat Tied, de Kerdels vun de Theke to holen. Dat Middel wär eenfach, een „Damenwahl“, nu sünd de Froonslüüt aber na dan Tresen hin und shon wär Leben up dan Saal. Wenn dat so richtig in Gang wär, denn so hebbt se ein „Marschwalzer“ ankünnigt. Dorför hebbt de „Rifflis“ een Oog hat. Dat wär de beste Methode een annern Partner tau erwischen.

De Kerdels hebbt een Kreis bild, de Hannen up de Schuller vun dan Vödermann. De Froons inne Mitt ok een Kreis ober gegen de Richtung. De Kapell hät „Auf der Lüneburger Heide ..“ ,speelt und alle hebbt mitsungen. Denn so na 2 Runn‘n hebbt se batz uphört, nu hebbt sick all‘ losloten und na rechts rümdreiht. Nu hät dien neige Partner di schon anlächelt. Jetzt wör wär kräftig danzt. Na een Ogenblick hör de Musik denn up und de Reegen hebbt sick wär neit formiert.  –  “Hoch auf dem gelben Wagen..“ wär nu kräftig sungen. Bumms und Batz hörn se wedder up, und, wär na rechts dreihn, schon wärd passiert, und meist hett man een annere Deern erwischt. Düsse Danz hät een poor Runnen duert, ober man mut seggen, meist güng dat denn wär an Tresen oder man güng mol een Sekt drinken.  Bi Mencks an de Seev hät man för düssen Zweck dan Höhnerstall utrümt mit Spezial-bedienung ut de Großstadt. Bet an dan fröhen Morgen wär denn ok langsam Schluß.  Nu käm ober de Höhepunkt vun jedet Fest in uns Dörp:

„Dat Feldquartier !“

Wenn dat Personal mit’mol mit affrümen anfungen hät, denn so wär de Moment kommen, dan Saal mit Dischdecken tau bedecken. De hatte Kern hät sick denn up de Dischdecken sett und twei vun de Musikers stell‘n sick twüschen de „müden Krieger“. Mit Schifferklavier und Trompet hebbt se sungen und dorbi in de Arms lägen. „Im Feldquartier auf hartem Stein ..!“ dormit güng dat los, denn so käm „Lilli Marleen“, und anfangs noch een Poor Soldatenlieder dortau. „Höhn Fritz“ hät denn ok noch ein Köm utgeben und de Köök hät noch een Stück Wittbrot dortau bröcht.  Meist een halbe Stünn hät de Zeromonie duert, aber ohn dütt Ritual güng keen Ball to End‘.

Denn so güng dat na Huus hin, een langen Weg, de Frons würn in Arm nommen  und kreegen dan Joppen öber de Schuller, de Kerdels müssen ehren Haut retten för dan nächsten Daag.  Vicks Walter und Erika hebbt ünnerdess de Footkranken in’t Dörp kutchiert.

Dat sogenannte „Nachtvesper“ hät man schon up dan Saal utmookt. So manche Froo hät denn ok noch in Ballkleed Eier braat an fröhen Morgen, eenige müssen denn ok bilütten na’n Melken hin.

De eisten Schützenfeste an de Seev wärn noch prägt vun de schrecklichen  Kriegsjohrn. Dat fiern käm aber nicht o kott. Ok noch in de 60er Johr hät man de Tradition mit int Dörp nommen.

Na 1963

wär denn up twei Säle in Dörp fie’ert, Antreen to de Proklamation bi Stumm up dan Hoff, meist schon in de Schummerei. Dreimal Danz und Sünnabends bi Scharfenberg de „Rifflies“ und bi Wickhorst de „Charli-Boys“. Mit twei Kapellen un ständiget wesseln na meist jeden Danz. Twischendör wör denn noch de „Raupenbahn“ opsöcht; hier künn man sik een Belohnungs-kuß för dan schönen Danz afhohln, oder so !? Dormit dat ok nümms seihn künn, wör eenfach een Verdeck öberstülpt, so‘een poor Runnen.

Ja, daumals wör all’ns noch beten romantischer !!

Nu aber wär up dan annern Saal, oder in de Sektbor. Gegen dan grooden  Hunger müss man in’t Clubzimmer. Dor künn manTante Berthas „Steaks“ bestellen, dat wär de Renner, besunners för de öllern Poore.

An de Theke noch schnell een Beer oder een Köm, oder taun verpussen in de Sektbor.

Herrliche Tie’n sünd dat wesen. Hüüt ward in Telt fiert mitten in Dörp, und Spoß mookt dat jümmers noch; wenn’t ok een beten anners is !

—–

Öber veel Festen heff ik nu grad bericht, ober all de Familienfesten wie Greune- Sülberne- und sogor Goll‘ne Hochtien dor heff ick keen Wort öber verlorn. Düsse Fie’ern sind up de Gasthüüs verdeilt wesen.

Hüüt aber giwt dat düüs Wirtschaften nich mehr, un wi möt wiet in anner Dörper reisen üm to fiern, ober ok dor ward dat schon weniger.

Wi hebbt een Huus mitten in Dörp. Dat Grundstück mit dan neien Dörpsplatz is vun Mencks an de Seev köft worn. Man kann dat schon as Glückfall anseihn. De Schützen und Füerwehrlüüd  bemöht sich vörbildlich üm de Rümlichkeiten und dan schönen Dörpsplatz umtau.

Dorför bedankt sick de Ramßler vun Haddden.

Ingo Pape in Juli 2022

„Lever Feste fiern, at feste arbei’n !“

( Een Spruch vun A. Scharfenberg Klosterkroog )

De Feste vun 1950 bet in de 70er Johrn wörn schon watt Besunners. In fief Wirtschaften mit veer Saals wärn de Festen goot verdeelt.

Aber nu to de Festen in Ramßel, hier nun ein lütten Überblick:

Fangt wi mit Wiehnachen an. Fröher is hier Wiehnachtsball wesen bi Rabens oder ok bi Scharfenberg.  De Silvesterball is nich regelmäßig wesen.

Wichtiger wär ober de Vörfreid up dat Faslamsfest. Besunners för de jungen Lüüd. So an de drei Daag  güng dat bilütten. Ober nich nur de Jungen, ok de Oolen wörn noch mit dorbi. Mit Skat an Freidag füng dat öft an und mit de Inkel an Sünndag to de Kinnermaskerad un Danz. Sünnabend wär denn ja noch de groote Maskerad, so richtig mit Kostüm und so, een Gaudi för sick. Sünnabend, so af de Mittagstied güng man vun Huus to Huus und hät schnoort mit veel Gesang und Musik. An Sünndag wär dennoch de Buddel söcht und meist ok funnen. An Mondag hät man dat Geschnoorte an Eier und Wust, aber ok nicht wenig Köm un Bee, verteehrt.

Denn wär eistmal Ruhe bet na Ostern tau.

Ostern

Traditionell wör de Osterball in de Regel in Mencks Gasthuus an de Seev veranstallt.

De jungen Lüüd (de Konfirmierten) sünd nu an de Reeg kommen und müssen dat Osterfüer herrichten. Eist vor- und löter achtern Ulenbarg, denn so güng dat na de Seev, an dan olen Sportplatz. Veer Eckpöhl und een Mittelmast mit een Kömbuddel boben anbunnen. Düssen schüll man sick angeln wenn he kippen dä ! Öft hät dat Arger geben mit de Harmstöper Jungs, de wulln dan Barg denn schon vöher affackeln. De Ramßler hebbt sogor Brandwachen insetten müsst.   Hüüt mokt dat de Füerwehr und freit sick meist öber ~ 500 Besökers de dor denn Beer, Grog, Wust un Pommes verköpt.

Pingsten

 Nu käm schon de Vörgeschack up dat Schützenfest in August. Bi Scharfenberg up dan Schoolhoff hät meistjedes Johr een Kettenfleeger oder een Luftschaukel upschlaan, vun de Firma Dieckmann ut de Kreisstadt. Anni Eilenberger hät denn bi schönet Weer, de Icemaschien bi Scharfenberg up dan Saal anschmeten und denn künn Sommer komm‘n, ok för uns Kinner.

Ein groodes Fest to Pingsten wär aber een Sportereignis up dan Saal von Hans Dörels. De MTV tohoop mit de Eilbecker Turnerschaft hebbt een Schauturnen veranstalt mit anschl. Sportlerball.

De Eilbecker harn daumals dat Jugendheim in Ohlendörp köft und dor ok ehr Sommerlager för de Kinner und Jugendlichen hat. Mit dan Speelmannszug hebbt wi de Turners denn ok bi de Autobahnbrüch afhohlt un bet up dan Saal bröcht. Hier hät de MTV sien‘ Turnhalle hat. All‘ns watt de MTV daumals an Gerätschaft upbaun künn, is vorzeicht worn, sogor een grodet Reck. Namen wie Ernst Grahle, G. Jupien und G. Jerate und Wolfg. Engelhard, löter denn Helmut Rieckmann und E. Kühne möt uptellt warn. Een Riesenwell künn sogor Herbert Schulze vun de Eilbecker zeigen.

Erich Eddelbüttel, Hans-Werner Danowski und Herbert Weiß hebbt dan Speelmannszug up de Bühne derigiert. De Kinner hebbt Bodenturnen mit Pesen Willi mokt und de Deerns und jungen Frauns hebbt gymnastische Übungen vörzeigt. För de Eilbecker wär denn Gerda Hofmann und Herbert Schultz taustännig.

Bernhard Pauls, Hermann Hartig, Alfred Prawitt und Heinzi Benthack müssen bi dat Dischtennis gegen de Hambörger ehr Künnen bewiesen. Wolfgang Dürre, Heinrich Deumann und een paar Dörpsprominente hebbt de Siegerehrung vörnommen und Abends wär denn een traditionellen Sportlerball.

Sowiet to Pingsten:

Nu geiht dat ober mit grode Schritten in Richtung Schützenfest

siehe Beitrag: Schützenfest is nu in Dörp

Vergeet dat man nie ..!

Vergeet dat man nie.., is de Titel vun een Stück ut uns Männerchor. Dan Text hett Ina Müller schreben. Wenn ik dat in mien Ohr krieg, mutt ik jümmers an mien Schwoger dinken. He is öber achttig Johr und hät för sick faststellt, dat bi dat ööler warn so veeles „schlechter“ ward. Ick will dat gornich alln’s uptelln, denn bi all dat giwt ok een Deil watt „beeter“ ward,  un dat is :

Dat „Vergeeten !!“

Uns Kopp müss egentlich doppelt so groot wesen bi all de Information‘ de dor Dag för Dag noch dortau kommt. Also: man blots nich dan Kopp vullstoppen mit Soken de in dan Duden oder int Telefonbook gehört. Wotau sall man sick dat marken, de Hauptsaak is, man weet wo dat schreven steiht !

Veellicht helpt jo ok „Eselsbrücken“ üm sick watt to marken, wo to‘n Bispeel „Backbord und Stüerbord“ is ; denn dat vergeet ick jümmer at Heidjer. Woneem is nu links oder rechts? … Links is dor wo de Dumen rechts is, rechts is und sowieger ! Wat veel Doog hät de Maand ? …dat kannst an dien Handrüch aftellen. Wo de Nees hinzeicht is nu mal Vörden oder graduut, und de Mors is ok jümmers achtern, een oole Wiesheit ! Mit Stüüer un Backbord, heff ick meist vergeeten, is de Geschicht vun dan Smutje de dan Moses mit de rechte Hand up de linke Back geben hät, de denn gliecks „Root“ worn is. Kiek an, Root und links is also „Backbord“. Leger ward dat mit de wichtigsten Dag int Johr. 24. Dez. oder ok 1. Mai behöölt man jo öcht, ober de Hochtiedsdag, dat is so een Saak. Mien Fründ de hät düsse Tahlen denn ok in de Lottotahlen inboot. Nich dat sien Froo sick nu besunners freit, nee, he hät ok schon mool drei Richtige hatt !!  Veele Lüüd schriewt alln’s up een Zettel, dat giwt ober een böse Zettelwirtschaft und Sökerei na de verflicksten Zettel. Man künn dat jo ok mol mit een Pinnwand versöken !

Na soveel Tipps, heff ick meist vergeeten dat hüüt jo uns Chorobend is !!

joon Putzbüdel in Juli 2022