Hochtieden in Ramßel
Verlobung: dormit geiht dat ja los. Verloben heit:
„Fastholen und wieger sööken“!
De Zeromonie vun dat „Schneuern“ ! Dat Poor sitt nebeneenanner up een Stauhl. Dat Poor leegt de Hannen in de Mitt übereenanner. Twei Tüügen kontrolliert de Zeremonie, und staht nebenbi. De Zeromonienmeister bind mit rodet Band een Schleif üm de tohoopgelechten Hännen und seegt sienen Spruch up:
Wir schnüren das junge Paar in Ehren.
Es möge uns die Schnur nicht verwehren,
und uns ein kleines Trinkgeld gewähren.
Möge sein die Gabe groß oder klein,
wir wollen damit zufrieden sein !
Lütten Anhang: Wenn een Poor de Verlobung uplöst hätt, denn so dröff de Zeromonienmeister nich wedder „schneuern“ !!
In Ramßel wär dat so üblich, dat man to de Verlobung noch Geschinke bekäm. Spoßig wär jümmers seegt, wenn du sowiso Heiroten dahst; evtl. weil dat „dringlich“ wär, denn so kannnst di ok verloben. Worüm ? Von dan Textilhöker bekäm man 3-5 Geschirrdeuker to de Verlobung, bi de Hochtied gäv dat 3 Frotteedöker. Hesst du di nich verlobt, denn so gäv dat eben blots een Deil! … so eenfach is datt !!
Nu geiht datt up de Hochtied to !
Vör de Hochtied hett man Polterobend fiert. Meist so twei/drei Dag vör de Hochtied. Vör de Huusdör stünn denn een oole Dör mit een groden Stein dorför. Nu keemen de Lüüd dorbi und hebbt jümmer oolet Geschirr ut dan Schapp in Keller söcht, un denn güng dat dorbi. Wenn denn ok mool een Klooschötel un een Waschbecken dorbi wär, denn man bloots, weil dat ok witt wär. Dortau gäw dat natürlich een ut dan Buddel. Wenn de Kreis tämlich grood wär, so hatt man dat ok in de Gaststää oder in de Schüün fiert mit een poor Happens dorbi, ober in eiste Linie „Drinken“. An dan Folgedag hett man in Dörp öft veele Straten sein, de mit Saagspeun afstreit wörn. Dat so wär denn een „Katerstieg“ de öfters ok quer dör dat Dörp güng, un ok na verschiedene Hüüs. >> Dat käm up dan Kater an !! >> Löter, at de Timmerei nich mehr dor wär, hett man ok witten Sand insett. <<
In de Tied vör de Hochtied hebbt sik ok einige Lüüd Gedanken mookt, wie dringlich de Hochtied denn so is !? Hätt man nu annomm’n dat dat ok „hoch Tied“ wär mit dat heiroden, denn so hätt man wie bi mi tohuus een oolen Kinnerwogen up dat Huusdack befördert. Meist so in de Schummerei oder bi Nacht un Nebel wür dat Deilt dor denn ruppwracht. So stünn denn de oole Kinnerwogen bet meist no de Hochtied boben up dat Dack.
Watt wär so los an dan Hochtiedsdag ?
Eistmol wär dat alln’s mit veel Upreegung verbunnen. Putzbütel, neige Kledasch, alln’s wür trechleggt. Klock tein wür denn jo de Stanndesamtliche noch bi dan Bürgermeister in de goode Stuuf. De Trautügen wärn mit mit vun de Partie. Na de Reed den’n ok, „Sie dürfen die Braut jetzt Küssen!“ Dat Stammbook gäw dat mit dan Hinwies, man fluugs för „Indrääg“ to sorgen. Ik heff so bi mi dacht: „…. alln’s schon in Arbeit“. Schnell noch poor lütte Bloom, een Sekt un na Huus hin. Hier würn nu denn schon de ersten Gäst vun Uterhalv. Fröher hebbt düsse Gäst denn ok in de Wirtschaft noch Fröhstück kreegen. Hier bi dat Fröhstück hett man de Dischdam towiest kreegen, besonners de Unverheirat’n oder „Singel-Poore“ wärn sehr gespannt.
So bi Klock Twei güng dat den‘n na de Kark hin. Poorwies achter Bruut un Brögamm. Vörweeg twei Kinner ton „Bloomstrein“
Öber de Geschicht mit de Kark will ik nur vertelln, dat denn ok de Pastor mit siene Froo sik anschloten hebbt. Glicks achter de Porten vun Karkhoff wör nun de eersten Hürden upbaut. Dortau hebbt meist twei Lüüd ut de Kneipen ümtau, een Strick trocken und somit hebbt se ok watt kreegen gegen dan Döst, Kinner hebbt nur Sötigkeiten kreegen. Dat sünd de Upgaben vun de Trautügen wesen. Mannichmool sünd dat bet tau 6 Stricken wesen de dan Weg na de Fie’er upholen hett.
Nu wärn dat nur noch een poor Schritten na de Wirtschaft tau. Hier hätt denn een Musiker mit een Schifferklavier speelt und „Höhn Fritz“ hät een Sekt för dat Bruutpoor utgeeben. De Glöös wörn glieckt up de Eer smeeten, vun wegen : „Scherben bringen Glück“.
Nu keem denn „Foto Böhmer“ an de Reeg. Öft hät he sein Dreibein in Stolten sien Infohrt stellt, dormit he ok all de Lüüd up dat Bild kriegen dä. Mind. Fief mool is he ünner dat swatte Dauk krabbelt, bet he denn alle Lüüd in Kassen un up dan rechten Platz hat hett. Een lütten Dialog dorto: „Kannst du deiner Biene mal sagen, sie soll etwas nach rechts rücken ! säh de Fotograph; denn hät he andert : „Du kanns ruhig Brummer tau ehr seggen“ ! ( He wär man lütt und de Froo beten watt stabieler) Düsse Foto-Zeromonie hätt jümmers sein Tied duert, denn sünd de Gäst up dan Saal stürmt, weil se bilütten Hunger harrn. De Plätz finnen wär ok ümmer so‘n Akt. De Bruut hett sik intwischen een beten steilt und frisch mookt. >> Nu een „Tusch!!“ Mit Oberkellner Höhn Fritz vörweg güng dat Bruutpoor an dan Platz vör de Bühne. Nu eist künn sik de Gäst wer hinsetten. De Begrüßung güng los und de Kapell hät dan’n „Suppeninmarsch“ speelt mit veel Geklatsche. Natürlich wär dat „Hochtiedsupp“
>> So hebbt nu alle mit „smericht Muul öbern Disch keeken“, so hät man fröher seggt. Twüschen de 3 Gänge wör denn de Hochtietszeitung vörleest, wo alle Lüüd jümmern Spruch kreegen hebbt. Dat Spektokel hett ok sein Tied köst, un man wär froh, wenn een sik de Fööt verpetten künn. Nu is de Saal denn ümbaut worn dormit man beter danzen künn. Los güng dast mit een Ehrendanz för dat Bruutpoor, de Öllern un so wieger. Dat so is de Beginn vun een langen Abend wesen. Gegen 10 müss de Brögamm beten up seine Froo uppassen. De Braut wurde von Gästen, meist Frünn entführt in een vun de veelen Kneipen in Dörp. De Brögamm müss denn de Zeche betohlen oder de Trautügen, wenn he se denn funnen hett. De ganze „Entführung schüll dan Rahmen ok nich störn und wär denn ok na een Stunn‘d vörbi. Wenn nu de Mitternacht käm denn müss de Brögamm seine Froo wedder ganz dull fastholen; nu wuul man de Bruut dan Schleier affrieten. „Schleierdanz“ !! De Bruut in de Mitt, un alln’s ümto hebbt dan Kreis jümmers enger mookt.
Hett de Musik uphört to speelen, denn so güng dat „Rieten“ los. Gegen Klock Een wär denn ok Nachtvesper ansecht. Meist wär dat in Buffeetform upstellt in een Nebenroom.
„Endlich mol wedder watt to Eten!“ und Appetied is ok dorwesen vun veelen danzen. Mit Torte, Frikadellen und alln’s watt smecken deiht, wenn man ollich rümtooft hett.
De letzte Deil vun dan anbroken Vörmittad hett man noch düchtig danzt. De Saal hett sik denn ok tämlich leert. Dat Personol rüüm de Dischen aff. De witten Decken up de Dischen wür denn up dan Saal leggt und in een groden Kreis hebbt de letzten Gäst Platz nommen. Dat wär denn een Gejuuche, un man hett dat „Feldquartier“ nennt !
„Im Feldquartier auf hartem Stein steck ich die müden Glieder… usw.“
Dütt oole Soldatenleid wör dann luuthals sungen und dorbi tau‘n Afschied gäv dat noch endlich mol een‘n ut dann Buddel und beten Wittbrott watt vun’t Nachtvesper öber blewen is. Een vun de „Rifflies“ ! stüün in dan Kreis oder butensiets und hett Lilli Marleen speelt. Duert hett dat ok noch so’n lütte halbe Stünn. >> Düsse groodordige Tratition is een beten ünnergahn wegen de wenigen Livemusikers.
Nu bilütten wär allgemeiner Aufbruch, un nu süll dat na Huus hingahn. De Eersten müssen daumals ok schon bald na’n Melken hin !!
Dat Bruutpoor stüün noch een poor Öberraschungen beför.
Wo is jümmer Nachtquartier ?? >> Meist hett man in de Privathüüs een Uppasser hat, de hett de Upgaaf hat, to verhinnern dat Fremde oder bekannte Gäst dorför sorgt, dat dat Bruutpoor een möglichst unruhige Hochtiedsnacht hett. De Schlapstuuv wär afschloten. Dat Bett wär vool mit Arfen oder de Madrazen stünn in de Garage. So üm de 200 Luftballons hebbt de Schlapstuuv füllt. Dat gäv schon dolle Sooken de de jungen Lüüd sik hebbt infall’n looten. Ik müss daumals mit de Froo bi de Öllern in de Ehebetten öbernach‘en. >> Wi bruken keen Hochtiedsnacht mehr, wi harn se all achter uns !! <<
Mien leeve Lüüd, wär dat een schöne Tied !!