Kufferpacken un Urlaub, dat hört tohoop !
„Ob du Froo büst oder Mann, wullt du Reisen muss du ran“ !
In all‘ de vergang’n Johr ist dat bi uns so Tradition; dat gifft twei Möglichkeiten, een kotte mit Auto, oder een lange Reis‘ mit Fleiger öber 14 Daag. Sommer oder Winter dat mutt man ok öberleggen. D.h. lange oder kotte Ünnerbüxen, Badeschlappen oder Warme Puschen. Bi de Tähnböst mutt man öberleggen, bin ik öber 60 Johr, kummt noch Kukidend dortau. Dat Wichtigste ober is denn ok de Pillendoos mit all‘ de Tabletten, de so gehört at eistes in Koffer. För jeedeen een Spender för dan Nachtschapp !
Nu ober to datt Kufferpacken:
Pyjama, Nachthemd, Ünnerhemden ,Strümp un Söcken (10). Schoohwark för dat Eten und dat Lopen. Badebüx oder Bikini, Lockenwickler sünd ok jümmers wichtig, een Fön un Rasierer för de Dröchrasur. Kölnisch Woter un een Stück gröne Seep, Nivea för de Nacht un alle Fälle. Nagelack und Manikürgeschirr. Wullt du twüschendürch wat eeten, so hört een Taschenmest in Kuffer rin. För dat abendliche Dinner mutt de Froo mind. een Kleed inpacken und för dan Kerd’l een Antog und Krawatt, so is dat hüüt anseggt. Dat ward nu allns in Kuffer stapelt un denn so geiht dat na de Wacht, nich de an Rhein, nee int Bad. Jetz is dat so at anner Johrn ok, >>> veel to swoor.
Dorbi krichst du doch de Wuut, doch de Minsch liehrt ni-nich ut !
Watt mutt ruut, watt köst dat Öbergewicht. Nu ward allns wedder utpackt un weniger Söcken un Ünnerbüxen. So geiht dat jümmers hin un her. Letzt Johr wär ok veel unnütz Tüch inpackt, schimp de Kerdl ! Nu eerst fallt mi up, dat dor keen Regenschirm bi wesen is. Wennt in Urlaub denn mol gütt, un di fehlt dat goode Stück, is dat swoor, du finds keen Laden. Dor helpt keen Geld un goode Wöör; denn so is dat een Mallüür!
Dorüm: „Hest du een‘ Schirm bi di, schient de Sünn so schoin as nie“ !!
„Sünnenschien is Urlaubsglück“ ; Tschüß,…un kumm ok heel wär trüch!
Ingo Pape 1/2024