Mit Corona in ‘t neege Johr 2022
Dat Johr 2021 is nu to En’n und dor is sogor noch beten Frost bi ween. De Badediek hett schon een dünne Iesschicht hat. Mien Schwiegerdochter hett denn ehr’n Bikini antrocken und nix wie hin na’n Diek in’t ieskoole Water. Dat sünd de „Hatten“. See jo nich, ober ik heff noch dree Dag frorn. Aber dat Weer hett sik schnell dreiht, und an Sünndag na Wiehnachen bün ik denn ok bi plus 15.5° noch öber 20 Km mit Rad ünnerwegens ween. Sowiet dat Weer, öber Wiehnachen geev dat na den „Karken-rundweg“, Fondue. All wörn 3mol impft und all mit Schnelltest utrüst. So güng dat ok an Silvester ruhig und kommodig tau. Dat Füürwark weer man blots öbersichtlich antokieken und de Knallerei verbaden und na 20 Minuten weer allns vörbi. Na den lütten Verpetter wedder in de warme Stuuv. Al dat 2. Silvester in de Grütt ! Nu aber is wedder de Alldag inkehrt. Corona aber ok, mit grode Macht und hooge Inzidenzen. Testen bi jede Gelegenheit, in Ramßel vun fief bet Middernacht, dat is wichtig för de Arbeitslüüd, de gilt man blots 24 Stünnen. Maske und Afstand is wichtig, weil de neege „Variante noch ansteckender ist“! seggt de Virologen.
Kinner sünd nu wedder in Präsenzünnerricht, na mol seihn, wat lang dat goot geiht ??
2022, wat bringt dat neege Johr ?
Een Johr geiht los, aber nich so at anner Johrn. De Faslamslüüd hebbt ehr groten Schiller rutstellt, doch dor steiht bi dat genaue hinkieken de Johrestahl 2022 dörstreken und dorneben 2023. „Faslam in Ramelsloh“. Ik kiek na dat Datum, hüüt is de 8. Januar. Dor weer jümmers „Snorren“ und an Obend denn ok „Danz up de Deel“ , Lumpenball und Maskerad, ja sogor toletzt in‘t grode Telt. Alle Faslamslüüd in bunte Kledage und wie al vör hunnert Johr’n sünd dat de jungen Minschen wesen, de dör dat Dörp lopen sünd. Hüüt nich mehr mit Eierkorf, aber dat Faslamsleed is wiet to hörn wesen. > Nu aber is 2022, up dan Weg na Knolles hebbt sik 3 Faslamslüüd, verkleed mit Bollerwagen und een bunten Faslamschaal üm dan Hals. Se hebbt jedeen towunken und luuthals „Faslam“ ropen. > > Dat is Faslam 2022 !?
„Wi jungen Lüüd hebbt een beten Bang, dat dat vergeeten ward“!
Uns Schützenkönig bangt sik ok al üm sien Königsball und an Schützenfest mag he gornich dinken ! >> 2021 sünd wi veer Schützenbröders und de Froonslüüd mit een Busünnernehmer ünnerwegens wesen. — Sowat hett dat bet dorhin noch nienich geven, to een Schützenfest in Urlaub to föhrn !!
Und wat passiert dütt Johr 2022 ?
De Planungen för uns „Osterfüer“, doran mach ik gornich dinken, un de Füerwehr eest recht nich, de hebbt noch dat 100jährige Jubiläum natoholen ! Allns utfollen !!
Vörbereiten mutt man nu ok bilütten dat „Maifest 2022“ mit den Flohmarkt. Nüms weet dat genau, wat dorut warn schall. „Dat Dörp wasst bilütten to, is kuum noch Platz för öber hunnert Marktbeschicker !? heff ik so bi mi dacht.
„De Dörper mööt ünner de Pandemie leeden, und as all Vereine aber ok de Karken. De veelen Ehrenämter dröfft nich inschlopen, so stünn dat in den WA. De .gesell-schaftlichen Folgen för de Tradition vun uns Volks- und Dörpsfeste sünd gornich afftoseihn. De Pandemie dröff nich länger anduurn, dorför hett de Präsident vun Schützenverband wohrschaut. „Düsse Festen hoolt de Dörper tauhoop, und dat mutt nich dörcheenanner kommen, se sorgt för dat grode Miteenanner“.
De Vereine mööt nu dörholen bet dat Gesellschaftliche wedder in’n Gang kommt und de Festen wedder losgahn künnt !!!
Veel Upseh’n hebbt de Minister kreegen bi ehr letztet Tohoopkummen.
Is dat nu vorbi oder noch nich ? De 20. März is nu de Utstieg fastleggt, anfungen hät dat an 16. März 2020. Twei vulle Johr hät dat nu all anduert, und nu is ok genoog. All‘ de Lüüd töwt nu up beter Wee’r, und dat Fröhjohr kann komm’n. Keen Snutenpulli mehr und de Afstand ward ok kommodiger. De Fuust kann’n ok wedder utstrecken und sogor mit de Ümärmelung gaht dat wär los. In de School ward de Laune vun de Schoolmeesters nu wär sichtbor för de Kinner. In de Familien kann wär fiert warn mit alle Lüüd, wenn ok dat Danzen noch beeten inschränkt is för een kodde Tied. „Testen“ loten mutt man sick af und tau noch mol, bevör dat in Urlaub geiht oder sowatt.
Mit dat „Picksen“ sünd se sick noch nich einig, aber wiss is, de Rest vun 20 Pozent mutt noch Imunität kriegen, sonst geiht dat in Harwst wedder los mit uns Liebling-swort „Corona“!
Ja, wenn dat denn so is, künnt wi jo wedder anstöten, wat jo nich günn, in de letzten Johrn.
Uns Schützenkönig töwt nu all 2 Johr up sien Königsball und Schützenfest, de arme Jung weit gornich mehr hin mit sien Geld. De MTV will denn in Juli mit een Sport-fest losleng’n, Öllern und Kinner sütt sick wär richtig uttoben up dan Sportplatz. Flohmarkt mutt ok losgahn und wart bestimmt tämlich grood. De Lüüd hebbt ja ehr Bööns und Kellers uprüümt, nu mutt dat Gedööns ober ok ünner de Lüüd. Dorbi mööt de Utrichter sick schon een Koop moken ob de Dörpsplatz noch grood nauch is. Kummt een beten up de nei’n Anwohners an, ob se dat Spektokel verdrägen künnt.
Ik glöw ja benah, mit een Köm und Beer alle’n, kriegt wi de Lüüd nich up uns Siet‘ !!
Vör dat Johr 2022 wüsch ik veel Spooß, besunners för de Fiern, de wi so vermisst hebbt. Steckt jau man noch een Muultasch in Joppen, mannichmol is dat ganz praktisch !!
Ingo Pape