Badedag in de föfftiger Joar

„Badedag in de föfftiger Joar“

nich to verwesseln mit den Waschdag, de weer ok eenmal in de Wääk, aber ik snack vun`n Badedag in de Zinkwann.

Bi us weer jümmer Sünnobends de grode Dag. He güng los in de Schummerei, also na`n Fierobend. Wi weern grad in de School kamen un mien dree Joar jüngere Broder müss dat Spektokel ok mitmoken. Us Mudder harr in de Kök twee Stöhl upstellt un doar müss de Zinkwann op stahn. Warm Water geef dat vun`n Kökenherd. Grote Pütt stünn fardig för dat heete Water un twee Ammels mit kold Water – de Grundutstattung. Af un an is de grode Waschkeddel in de Waschkök anböt` worrn, denn harr de annere Familie ok Badedag hatt. Toeerst weer de lütte Broder an`e Reeg. De Wann weer merst half full un de lütte Schietbüdel weer vun dan gröffsten Dreck befreit. Kloar mit Kernseep un Waschlappen; för de Fööt geev dat ok een kräftige Handböst. Shampoo geev dat noch nich un de Putzbüdel harr wat, dat schümen dä, ober ok ollig in de Oogen brennen dä. De Hänn un de Fööt weern tolest an de Reeg. Nu heet dat upstahn un affrubbeln.  Wedder hinsetten, Knie un Ellenbagen sünd noch swatt. Nu ober mit den naakten Moors op den Kökendisch un de Ohrn un de Nääs möten nakäken warrn.

Vadder hett nu den Dreck afschöppt un neeges Water togeven. Nu weer ik anne Reeg, eerstmol inweiken. De lütt Broder hett de Kontroll  vun de Fingers un de Töön öber sick ergahn laten.  Dat groode Handook flink ton drögen up den Heerd oder op de Lien. Datsülbige Gedöns bi mi, Püjama an un rinn inne Kist. Weern de Kinner to Bed, hett Vadders de Wann lerdig mokt un neeges Water ingooten. Nu keem een Prozedere, dat weer för us Kinner in`n Grooten un Ganzen tabu, sogor een Handook hüng för dat Schlöötellock.

De Zinkwann

De Zinkwann stünn meerst näben den Nebberdisch. Bi us weer de Wann jümmer in dan olen Swienkaben, de is umboot worrn för Holt un Kahlen. Glieks nebenbi weer dat Plumpsklo för tein Lüüd.  In`t Fröhjoar, wenn dat Füerholt all weer, weer denn kott Stroh un Sagspeun in den Room streit. Een poar Dag later keem den Kluckheuner- Klietsch-Maschen un bröch de Gössels för de Sommersaison. Hunnertunföffdig x hunnertunföfftig weer de Verschlag groot för de lütten Pieper. Weer dat noch to kold, hett noch een Rotlatüchen för een bäten Warms sorgt. Dat hett ober nich lang duurt, denn müssen de Aanten rut in dat Freigehege. Nu güng ok de duernde Striet los, keen ut Meinekes Dieken dat veele Aantenflott in grode Ammels holen müss.

 

Een grode Waschanlag weer dormols ok de Badediek.

 Obends na söben sammeln sik de Buurn, Knechten un Hülpslüüd an de lütt Muur vun`n Badediek. Seepennapp un Handook weern mitbrocht. Se keem vun de Arbeet up`n Felln or vun de Arnt. Rinn inne Badebüx un mit een Waschlappen un Kernseep vun baben bit ünnen afseept. De Fööt un de Been  op de Muur stellt un ollig afböst. Weer allens schier, den öber Kopp in dat Water un een Run`n öber`n Diek swummen. Denn in`ne Badebood afdröögt un umtrocken. Nu noch een poar Wöör snackt un den mit`n Rad  na hus.

De ganz hatten Jungs förn ok geern an`ne Seev, doar weer achter dat Seevewerk enn scheune, „harmonische“Badestä.

 

 

 

Text von Ingo Pape, ins Plattdeutsche geschrieben von Dieter Heick

 

 

Dieser Beitrag wurde unter 03 - Aus der Schulzeit veröffentlicht. Setze ein Lesezeichen auf den Permalink.